x

Lazy Monday – عن النرجسية وخالتها لاعبة الووتربولو

10

a5dbc3911a7ef832b27dc82b2bc3f79a

إزاي يعني واحد جايب لحد هدية في عيد ميلاده إنه رسمه؟ يعني ممكن تتفهم هدية في فرح والعريس والعروسة يعلقوا الصورة في الصالون، جو حريم السلطان، وعشان لما الضيوف ييجوا يقوقولهم إيه ده انتوا أهوه ماشاء الله.. هاهاها أهوه… لا بس الرسام ظلمك في مناخيرك يافاطمة..

.. –

 هو شافك قبل العملية ولللا إيه؟ –

 .. –

 المفروض نعمل بيفور وأفتر يابوحميد عشان كرشك ده اللي بعد الجواز بقي زلعة خالص –

..-

 إحنا عن نفسنا متخناش بعد الجواز عشان أنا وأسومتي (دلع أسامة) كنا بناكل قريش في شهر العسل، آه والله، صحيح جالنا عقم بس أهو مين محتاج عيال يعني هنخليهم يسرحوا يعني وللا ايه ماحنا معندناش حاجة يسرحوا عليها (ضحك عصبي) أنا بجد بحب الدنيا قوي والناس كلها

 بتحبوا الشذوذ؟ –

 لأ قصدي الناس الطبيعية (ضحك عصبي أكتر)……. أخبار الشغل إيه بقي والحياة الزوجية؟؟ –

 إحنا لسه متجوزين إمبارح –

 آه ماهو بيبقي كأنه إمبارح والله داحنا حتي جالنا فقدان في فيتامين ح والدكت –

 لأ إحنا فعلا لسه متجوزين إمبارح –

 طب وإيه بقي؟ –

 إيه إيه؟ –

 …. –

 …. –

 طب.. مش عاوزين فلوس؟ –

 آه قشطة، معاكوا كام؟ –

إيه يا أسامة معانا يكفي نروح؟ (ضحك هستيري.. ثم وقوع هادئ.. ثم موت.. النهاية).. ثم ضحك

تخيل بقي صورة زي ديه هتعمل إيه في الشخص في عيد ميلاده؟ يعني أنا واحد من الناس مبحبش أشوف خلقتي خالص تقوم انت جايبهالي؟ يعني أنا أصحي أشوف نفسي مرة في مرايا ومرة علي ورقة مرسوم؟ وممكن أكون حلمت بنفسي كمان أو مراتي بعتتلي صورة سييلفي لينا في استوديو كوداك؟ ( سوف يعاني المدققون هنا من استحالة المنطق انك تاخد سيلفي في استوديو كوداك، فين الراجل إياه؟؟ بتاع قفاك باين تعالي سلتة* شمال) ولو أنت خيالك حلو شوية وعقلك هندسي ورسمك حلو أقول إنه ياااه، يارب أبقي زي رسمتك ليا؟ مناخيري زي تخيلك لمناخيري؟ ياشيخ اتقي الله

كمان فيه حاجة، مش بفهم أنا بقي الناس اللي بتصحي تبص لنفسها في المراية توينك (تغمز) وتبص لجسمها تفرح، أنا كواحد من الناس نفسي كرشي يبقي disposable أشيله وقت مايخلص وأجيب واحد جديد من راديوشاك.. دا فيه ناس كمان (أه والله) عاملين صورتهم.. صورتهم!! باك جراوند لموبايلهم، طب ده الموبايل ده أداة العصر للهروب من النفس ومما يحيط بيها، أقوم أنا أشوف نفسي عليا أيقونات؟ واقف ببدلة في فرح ماسك عسير مانجا؟ وأدوس علي كرشي أفتح يوتيوب؟؟؟ وأقعد أقول ياريت عندي مناخير زي بتاعة اللي ياسر رسمهالي؟؟ أو فلات ستوماك زي زيتونة بتاعت باباي؟ كفاية شكلي اللي زي كعبول.. ياجدعان!! يادي النرجسية والهم وحب الذات والملذات** وفي الآخر يقولك قناة السويس ترعة وبننزل نستحمي فيها، مانتوا لو نرجسيين افهموا الباقيين.. وينك

الأسبوع القادم ممكن آخده أجازة عشان الحر والنبطشيات بس لو كتبت هكتب عن وزارة الصحة أو استخدامات زيت الزيتون كمانع للتسلخات.. الموضوعين بنفس الأهمية

________________________________________________________________________

سلتة: وحدة قياس والسلتة 23 فنطاز*

 ملذات محطوطة للسجع فقط وليس لها مكان نثري هنا**

Tags

About: Mohamed Farouk

Mohamed Farouk is one of the original Hezbians who started performing with Al Hezb El Comedy since its inception. His quick wit and awesome call-backs make his comedy a truly unique style that entertains everyone.